ILOILO CITY- Pagpabaya sa mga konsumidor kag paglapas sa layi ang nangin basehan sang Committee on Legislative Franchises agud i-deny ang franchise re-application sang Panay Electric Company agud mapadayon ang pagserbi bilang power distributor sa Syudad sang Iloilo.

Sa exclusive interview sang Bombo Radyo Iloilo kay Surigao del Sur-2nd District Representative Johnny Pimentel, deputy speaker sang House of Representatives, iya ginpahayag nga sa sulod sang 97 ka tuig sang Panay Electric Company sa patag sang power distribution, madamo ini sang nakumiter nga violation.

Suno kay Pimentel, ginlapas sang Panay Electric Company ang Magna Carta for electric consumers sa diin nag-overcharge ini sang 631 million pesos sa bills sang mga konsumidor.

Magluwas diri, napaslawan man ang Panay Electric Company sa nagligad ng lima ka tuig nga mag-apply para sa capital expenditure sa Energy Regulatory Commission agud mapa- improve kag ipaidalom sa modernisasyon ang ila pasilidad.

Suno pa sa mamalidha, mas gin-una pa sang Panay Electric Company ang paghatag sang 200 million pesos nga dividend sa ila mga stockholders sa baylo nga talupangdon ang mga konsumidor.

-- Web Ads --

Gindugang pa niya, nangin mabakod man nga basehan ang kapin 200 ka mga kaso nga gin-file batok sa Panay Electric Company bangud sa indi maayo nga serbisyo sa Syudad sang Iloilo.

Si Pimentel ang nag-move sa pag-deny sang franchise application sang Panay Electric Company kag wala sang bisan isa ang nagpamatok sa diin isa si Iloilo City Lone District Representative Juliene Jam Baronda ang nagboto pabor sa pagbasura sang application sang Panay Electric Company.

Facebook Comments

bomboradyo