ILOILO CITY- Nakahanda ang National Police Commission nga gilayon magpatigayon sang imbestigasyon sa tion nga matumod ang mga police personnel nga involved sa Chiyuto Double Your Money Scheme nga naka-base sa Roxas City, Capiz, kag ginapadalagan ni Patrocenio C. Chiyuto ukon Don Chiyuto ukon Don Zhang Lee Chiyuto.

Sa interview sang Bombo Radyo kay Atty. Joseph Celiz, Regional Director sang Napolcom Region 6, iya ginpahayag nga may ginauyatan na sila nga inisyal nga mga impormasyon.

Suno kay Celiz, kalakip man sa ila ginatipon nga mga ebidensya ang ginapahayag mga facebook posts sang mga police personnel nga kaangay nga nagapadayaw samtang nagauyat sang madamo nga kwarta.

Sa subong suno sa natungdan, premature pa para sa Napolcom nga maghimo sang legal nga tikang apang nagpaandam ini may kaangtanan sa mga kaso nga mahimo atubangon sang mga pulis nga nagpakigbahin sa nasambit nga double your money scheme.

Padayon man ang pagpakig-angot sang Napolcom sa Police Regional Office 6, Securities and Exchange Commission kag sa Department of Trade and Industry.

Ginpahayag naman ni Celiz nga kon basehan ang flow sang kwarta sa nasambit nga investment scheme, imposible nga makaangkon sang tuman ka dako nga kwarta sa tuman ka malip-ot lang nga panahon.

Suno pa sa iya, nagapakita lang ini nga illegal ang Chiyuto Double Your Money Scheme.

Facebook Comments

bomboradyo