Nagnubo sa P3.55 ang presyo sang kuryente sa kada kilowatt per hour subong nga bulan sang Hulyo para sa mga residential nga konsumidor sang MORE Electric and Power Corporation.

Sa exclusive interview sang Bombo Radyo kay Karen Joy Elequin, Energy Sourcing Manager sang MORE Power, iya ginpahayag nga ini ang kasunod sang pagkonekta sang mga substations direkta sa National Grid Corporation of the Philippines (NGCP) sa diin nakapamakal na sang mas barato nga kuryente ang suppliers.

Suno kay Elequin, nakakuha sila sang 100 porsyento nga suplay sang barato nga kuryente sa Power Sector Assets and Liabilities Management Corporation nga amo ang naga-operate sang Geothermal Plant sa Leyte.

Ginalauman sang MORE Power ang padayon nga pagnubo sang kuryente sa masunod nga anum ka bulan sa tion nga matapos na ang ginapatigayon nga Competitive Selection Process sang mga supplier.

Halos masobra na sa P5.00 ang kabug-usan nga pagnubo sa presyo sang kuryente umpisa sang nag-operate ang MORE Power sa syudad sang Iloilo.

Facebook Comments

bomboradyo