Nagboto ang Pilipinas sang pabor sa resolusyon agud i-kondena ang pagsalakay sang Russia sa Ukraine sa emergency special session sang United Nations General Assembly (UNGA).

Sa nasambit nga session, nag-apelar ang Philippine delegation nga proteheran ang mga sibilyan kag tapuson na ang kinagamo sa Ukraine.

Ginpatigayon ang United Nations General Assembly emergency session matapos gingamit sang Russia ang ila veto power agud punggan ang Security Council resolution nga nagakondena sa ginahimo nga pagsalakay sang ila militar sa Ukraine.

Una diri, ginpahayag ni Defense Secretary Delfin Lorenzana nga mangin “neutral” ukon wala sang dampigan ang gobyerno sang Pilipinas sa nagakatabo nga kinagamo sa tunga sang Russia kag Ukraine.

Sa isa ka presidential debate sang nagligad nga Miyerkules, ginpahayag ni presidential candidate kag senador nga si Panfilo Lacson, nga dapat mag-upod ang Pilipinas sa “peace-loving” countries nga nagapamatok sa ginahimo sang Russia.

-- Web Ads --

Bisan malayo ang Pilipinas, ginpahayag sang senador nga madalahig ang pungsod sa istorya sa ekonomiya sa tion nga maglala pa gid ang sitwasyon sa Ukraine.

Suno sa UN, ini ang pinaka-una nga United Nations General Assembly emergency special session humalin sang 1982.

Huwebes, Pebrero 24 sang nagligad nga semana sang nag-umpisa ang Russian invasion.

Ginrason ni Russian President Vladimir Putin, nga nagpangayo sang bulig ang separatist leaders sang Donetsk kag Lugansk regions sa Ukraine, agud punggan ang ginapahayag pag-atake sa ila sang pwersa sang Ukraine.

Wala naman nagapati ang Western countries kag United Nations sa mga rason ni Putin.

Ini bangud ginapahayag nga ginlapas sang Russia ang Article 2 sang UN Charter, nga nagamando sa mga miyembro nga indi maggamit sang kalakasan kag pagpamahog sa pagresolba sa mga isyu.

Facebook Comments

bomboradyo