ILOILO CITY- Nagaplano ang Panay Electic Company nga liwat magpasa sang ila franchise Application sa Kamara.

Ini matapos ginbasura sang House Committee on Legislative Franchise, ang re-application for franchise sang nasambit nga electric company.

Sa interview sang Bombo Radyo kay Mr. Mikel Afzelius, Corporate Affairs Manager sang PECO, iya ginpahayag nga indi pa katapusan sang tanan para sa ila ang nasambit nga desisyon.

Suno kay Afzelius magafile sila liwat, kag magahimo sang maayo nga representasyon agud mapaintindi man sa mga mamalidha ang ila tinutuyo.

Sa ginpatigayun nga hearing suno sa iya, wala sila nahatagan sang tyansa nga liwat makahatag sang sabat sa pila man ka mga palamangkutanon ukon isyu nga ginahaboy sa ila.

Ginkakibot man nila suno kay Afzelius nga madasig ang pag-schedule sang hearing, apisar wala pa sila nakatapos pasa sang mga nagakaigo nga mga dokumento.

Nakabatun man sila sang feedback suno sa iya nagikan sa pila ka mga mamalidha, nga maghalong sa hearing bangud posible may mga desisyon na nga mahimo.

Indi man tanan nga katapo sang komitiba ang present suno sa iya, apang may tatlo ka mga kongresista nga tuman ka vocal kag halos indi pabor sa PECO.

Desidido naman sila magrefile bangud wala sang kagamitan ukon assets nga magdistribute sang kuryente ang MORE Electric and Power Corporation apisar may yara na ang mga ini sang prangkisa.

Facebook Comments

bomboradyo