Nagsaka na sa 128 ang numero sang napatay sa Indonesia bangud sang lapnagon nga pagbaha.

Suno kay National Disaster Mitigation Agency spokesman Raditya Jati, 72 naman ang missing kag 8,424 ang apektado bangud sang madalom nga baha tuga sang pagbubo sang mamunog nga ulan sang Domingo.

Ang makamamatay nga pag-ulan ang nagbilin man sang 27 ka casualties sa kaiping sang Indonesia nga East Timor kag 27 diri ang missing.

Suno sa nasambit nga ahensya, ang flash floods ang nakaapekto sa 10 ka regencies kag isa ka syudad.

Kalabanan sa mga napatay ang nalubong gid sa lutak kag gin-anod sang ulihi sang baha.

2,000 ka mga balay ang naguba kag dinosena naman ang natabunan sang lutak kag debris.

Nabudlayan man ang otoridad sa pag-evacuate sa mga biktima bangud sang guba nga mga taytay kag madanlog nga mga dalan.

Suno sa Meteorological, Climatological and Geophysical Agency, ang extreme weather sa eastern Indonesia, nga may transition halin sa rainy season tubtob sa dry season, ang tuga sang tropical cyclone Seroja.

Ang ini nga tropical cyclone ang ginapanan-aw nga magabaskog pa sa masunod nga 24 ka oras, maga-focus sa palibot sang Indian Ocean, kag magahulag palayo sa Indonesia padulong sa Nabagatnan-nasidlangan.

Facebook Comments

bomboradyo