ILOILO – Matapos ang kontrobersiya nga gin-atubang sang Governor Niel D. Tupas Sr. District Hospital sa Barotac Viejo, Iloilo bangud ginbalibadan sang nurse nga atipanon ang isa ka pasyente nga gindala sang pulis halin sa banwa sang Banate, may isa pa gid ka nabukaran nga kaso sang ginapahayag pagpabaya sang ospital.

Sa interview sang Bombo Radyo sa tagreklamo nga si Abelardo Engada, Jr., residente sang Barotac Viejo, Iloilo, iya ginpahayag nga nagpasa sila sang reklamo sa Iloilo Provincial Government bangud sa sini nga kaso, patay gid ang iya nga anak.

Mayo 23, gindala ang anak ni Engada sa amo nga ospital bangud sa head injury kasunod sang vehicular accident.

Ginpanugyan sang doktor nga iperform ang intubation procedure sa anak ni Engada apang kinahanglan pa nga maghulat pagkaaga.

Wala man sang first aid procedure nga gindapat sa biktima.

Bangud emergency ang sitwasyon, nangayo si Engada sang iban nga option kag gin-refer sila sa ospital sa Barotac Nuevo, Iloilo.

Ginpahayag ni Engada nga wala sang nurse nga nagsunod sa ila sa ambulansya samtang ginasaylo ang pasyente sa banwa sang Barotac Nuevo.

5:30 sang hapon sang nagpangayo sang assistance si Engada sa nurse apang ginapahayag nga nagpamalibad pa ang nurse on duty nga mag-upod sa ambulansya bangud tubtub lang 7:00 sa gab-i ang iya nga duty kag may masugat sa iya.

Bangud sini, nagdiretso na lang ang pasyente sa Barotac Nuevo apisar wala sang kaupod nga nurse kag wala man sang oxygen tank sa ambulansya.

Ginahapo na ang anak ni Engada kag pag-abot sa ospital sa Barotac Nuevo, natukiban nga wala man sang koordinasyon nga ginhimo ang Governor Niel D. Tupas Sr. District Hospital sa Barotac Viejo.

Maswerte lang sila suno kay Engada nga gin-akomodar sila sa gihapon.

Ginpatigayon ang intubation apang ginrefer pa gid sa ospital sa Iloilo City kag pagkaligad sang duha ka adlaw, napatay na ang pasyente.

Facebook Comments

bomboradyo