Ginbawian na sang kabuhi ang 20 anyos nga babaye nga gintiro sa ulo sang tinalikdan nga semana sa anti-coup protest sa Naypyidaw sa Myanmar.

Ini mismo ang ginkumpirma sang ospital sa diin gindala ang biktima.

Nag-upod sa hublag protesta si Mya Thwate Thwate Khaing sang Pebrero 9 batuk sa militar sa diin siya ang pinaka-una nga napatay humalin sang ginkuhaan sang gahom sang militar si Aung San Suu Kyi.

Nagkinagamo ang protesta sa lugar matapos nga ginpaulanan sang rubber bullets sang mga security forces ang mga protesters.

Apang suno sa mga doctor sa ospital, duha ka mga tawo ang kritikal subong bangud sa pagpangtiro sang mga militar.

Bangud sa kamatayon sang 20 anyos nga babaye, ini ang naghatag sang simbolo sa mga protesters nga padayunon pa ang pagpatigayon sang hublag sa diin uyat nila ang mga banners nga may laragway sang biktima samtang nagasinggit sang hustisya.

Facebook Comments

bomboradyo