Inadlaw na gid lang ang ginaisip sang MORE Electric and Power Corp. (MORE Power) kag ila na nga ma-acquire ang distribution assets sang Panay Electric Co. (PECO).

Ini matapos ginbasura ni Presiding Judge Marie Yvette D. Go sang Regional Trial Court Branch 37 sa Iloilo City ang mosyon sang PECO nga i-suspend ang expropriation proceedings ilabi na ang pag-isyu sang writ of possession.

Sa interview sang Bombo Radyo kay Atty. Hector Teodosio, legal counsel sang MORE Power, iya ginpahayag nga wala na sang may makapugong sa MORE Power nga i-take over ang assets sang PECO ilabi na nga may order nga padasigon ang pagresolba sang application sang writ of possession.

Suno kay Teodosio, nadeposito naman sang MORE Power ang 483 million nga amount bilang estimated total value sang power distribution system properties sang PECO.

Dugang pa ni Teodosio, apisar may yara pa sang separado nga kaso nga gin-file ang PECO sa Mandaluyong City RTC Branch 209 nga naga-kwestiyon sang constitutionality sang Republic Act 11212, ang layi nga nagahatag sa MORE Power sang congressional franchise agud mag-distribute sang elektrisidad sa syudad,madayon gihapon ang proseso sang application sang writ of possession sang MORE Power.

Una na ginpahayag sang PECO nga wala sila nagakadulaan sang paglaum kasunod sang nangin desisyon ni Judge Go.

Sa interview sang Bombo Radyo kay Marcelo Cacho, administrative manager sang PECO, iya ginpahayag nga matuod nga ginbasura sang korte ang ila ginpasaka nga Motion for Reconsideration apang madugayan pa suno sa iya bag-o makuha sang MORE power ang ila mga asset.

Facebook Comments

bomboradyo