Magapatigayon sang imbestigasyon ang Police Regional Office (PRO) 6 tuhoy sa kapaltahan sang Oton Municipal Police Station nga marespondehan gilayon ang natabo nga pagpangluthang-patay sa quarantine facilty sa Barangay Mambog, Oton, Iloilo.

Ini ang kaangot sa reklamo ni Punong Barangay Vanessa Salinas nga wala may nakasabat sa ila cellphone sang ila gintawgan, kag halos isa ka oras pa antes makaabot ang Oton Municipal Police Station.

Sa exclusive interview sang Bombo Radyo kay PLt. Col. Joem Malong, spokesperson sang PRO 6, iya ginpahayag nga katuyuan sang imbestigasyon amo nga matumod kun sin-o ang nagasugid sang matuod sa tunga ni Punong Barangay Salinas kag sang hepe sang Oton Municipal Police Station nga si Pol. Captain Robert Jayson Pancha.

Suno kay Malong, sa tion nga indi makasabat sa tawag ang isa ka police station, ginpasakaan sang kaso ang mga ini.

Sa kaso naman sang Oton Municipal Police Station, ginatugyan naman sang PRO 6 kay Iloilo Police Provincial Office (IPPO) Director Pol. Col. Gilbert Gorero ang katungdanan agud madisiplina ang iya mga tinawo.

Facebook Comments

bomboradyo