‘Proud’ nga nag-martsa ang Team Philippines kahapon, Agusto 24 sa Olympic Stadium sa parade of nations sa opening ceremony sang Tokyo 2020 Paralympics.

Ginpangunahan sang flag bearer kag para athlete nga si Jerrold Mangliwan (wheelchair racing) ang pagsulod sang delegasyon sang Pilipinas sa 16th edition sang Paralympic Games nga magalawig tubtob Septyembre 5, 2021.

Ini ang ginpatigayon sa Tokyo, Japan, ang host city sang bag-o lang natapos nga Olympiada.

Nahibaluan nga anom ka Filipinos ang qualified sa hinampang.

Lakip diri sanday Ernie Gawilan kag Gary Bejino (para swimming), Jerrold Mangliwan kag Jeanette Aceveda (para athletics), Allain Ganapin (para taekwondo), kag Achelle Guion (para powerlifting).

-- Web Ads --

Sa anom, sanday Guion, Mangliwan kag Gawilan ang second-timers na sa Paralympics.

Apang pila ka oras bag-o ang opening ceremony, nangin lima nalang ang six-man Philippine Paralympic team matapos nagpositibo sa COVID-19 ang powerlifter nga si Achelle Guion nga nangin huol para sa iya ika-duha na kuntani nga Paralympic stint.

Nahibaluan nga may duha na ka bronze medals ang Pilipinas sa Paralympic Games matapos nag-3rd place si Adeline Dumapong (Powerlifting) sa 2000 Sydney Paralympics, amo man si Joseph Medina (Table Tennis) sa 2016 Rio Paralympics.

Subong nga tuig, 540 ka events ang patigayunon sa 22 ka hinampang.

Sandig sa official schedule, si Bejino ang una nga magahampang sa team sang Pilipinas sa men’s 200m individual medley kag patigayunon ini sa Hwebes, Agusto 26.

Facebook Comments

bomboradyo