ILOILO CITY- Ginpaandaman na sang Philippine National Police (PNP) ang tanan nga koridor angot sa illegal nga operasyon sang Peryahan ng Bayan sa Probinsya sang Iloilo.

Ini matapos nga ginkumpirma ni Philippine Charity Sweepstakes Office (PCSO) General Manager Royina Garma nga wala sang permiso nga magpatigayon sang operasyon sa Iloilo ang Peryahan ng Bayan.

Sa interview sang Bombo Radyo kay Iloilo Police Provincial Office (IPPO) Director Police Col. Gilbert Gorero, iya ginpahayag nga wala anay sila nangdakop sang mga koridor nga nagapataya sa Peryahan ng Bayan bangud sa konsiderasyon nga wala pa makahibalo ang iban sa ila nga illegal ang nasambit nga numbers game.

Suno kay Gorero, gin-abisuhan man sang IPPO ang mga koridor nga magsaylo na lang sa legal nga numbers game nga may yara sang permit gikan sa PCSO.

Gindugang sang IPPO director nga pagkatapos sang ila ginhatag nga paandam, indi na magduha-duha ang PNP nga dakpon ang mga koridor kag manugpataya sang Peryahan ng Bayan.

Samtang, ginpaandaman man ni PCol Gorero ang tanan nga police personnel nga involved sa iligal nga mga aktibidad nga indi siya magduha -duha nga arestuhon ang mga ini.

Ini may kaangtanan sa kaso ni Police Cpl. Virgilio Rojo nga nadakpan sa akto nga nagapatigayon sang iligal nga bulang sa Cagbang, Oton, Iloilo kag nagtrending pa matapos nakuhaan sang video nga nagapalagyo antes ini nadakpan sa pihak nga barangay.

Suno sa iya, wala sang lugar sa PNP para sa mga personnel nga salawayon.

Facebook Comments

bomboradyo