ILOILO CITY- Ginpanghaboy nalang sang isa ka flower vendor nga nagapwesto sa Iloilo Central Market ang iya mga stocks nga nagkalalaya bangud nga wala na sang may nagabakal.

Ini matapos ginpasirado ang mga flower shops kasunod sang pagpaidalom sang syudad sa Modified Enhanced Community Quarantine nga nagamando sa pagpauntat sang operasyon sang non-essential establishments.

Sa interview sang Bombo Radyo kay Rosalie Cedeño, iya ginpahayag nga sa subong, agud nga indi man sila madulaan sang palangabuhian, online nalang sila nga nagabaligya kag gina-deliver nalang nila ini sa mga kliyente.

Apang suno kay Cedeño, tuman man kaiwat sang naga-order online kag ang ila kinitaan ang makaigo lang sa adlaw-adlaw nila nga konsumo kag pambayad sa kautangan.

Samtang, nagamantinir nalang sa P150 per day nga sweldo ang soltero nga si Frederick Saleco nga nagaobra sa flower shop sa Iloilo Central Market.

Suno kay Saleco, kon sadto P300 per day pa ang iya sweldo, apang bangod nga ginpasirado ang mga flower shops kasunod sang pagpaidalom sang syudad sa Modified Enhanced Community Quarantine, nagaantos anay siya sa gamay nga kita paagi sa pagdeliver sang bulak sa mga clients nga naga-order online.

Naghingyo naman ini sa Iloilo City Government nga kuntani buksan na ang mga non-essential establishments bangod nga ang mga nagaobra diri ang essential man sa ila pamilya.

Facebook Comments

bomboradyo