Ginatutukan sang Iloilo City Police Office ang pagbantay sa mga bangko kag mga jewelry shops nga mahimo masunod nga target sang mga pangayaw nga mga kawatan nga nakasulod sa Iloilo.

Ini kasunod sang natabo nga pagpangawat sa Aljun Jewelry Store sa isa ka mall sa Guanco Street,Iloilo City Proper sa diin masobra sa tunga sa milyon nga balor sang alahas ang nataban sang lima ka suspek.

Sa interview sang Bombo Radyo Iloilo kay Police Lt. Col Jonathan Pablito, hepe sang Police Station 1, iya ginpahayag nga partikular nga ginatutukan sang ICPO ang Iloilo City Proper Area nga makabig nga high risk bangud sa presensiya sang madamo nga bangko kag mga baligyaan sang alahas.

Apang suno kay Pablito, indi man nila pagpabay-an ang iban nga mga areas bangud mahimo man hingalitan sang mga kawatan nga mag-atake sa mga tago nga lugar.

Bilang pagpanghanda man suno kay Pablito, ila na naistorya ang mga security officers sang mga bangko sa syudad agud nga mangin alerto ang mga security guards nga naga-duty sa nagkalain-lain nga eastablisiemento komersyal.

Facebook Comments

bomboradyo