Bakunahan batuk sa COVID-19 ang mga atleta kag team members nga nagatinir sa Olympic village sa Tokyo, Japan samtang ginatinguhaan sang mga organizers nga pakalmahon ang kakulba nga ginabatyag sang kadam-an sa desisyon nga dayunon ang event sa pihak sang pagtimbuok sang kaso sang virus sa nasambit nga pungsod.

Duha ka bulan antes ang pandemic-postponed Tokyo Games nga magabukas sa Hulyo 23, pila ka bahin sang Japan subong ang yara sa idalom sang state of emergency kag mayorya sa mga Japanese ang luyag kuntani nga kanselahon ang hampang.

Suno kay International Olympic Committee chief Thomas Bach, safe nga lugar ang Olympic village kag ang Olympic kag Paralympic Games sang Tokyo 2020 ang i-organisa sa safe man nga pamaagi.

Si Bach kuntani ang magabisita sa Tokyo subong nga semana apang bangud sa virus restrictions, wala ini natigayon nga makakadto sa nasambit nga lugar.

Pahayag niya, sa subong nga tion, 75% na sang mga residente sang Olympic village ang nabakunahan kag pagabakunahan pa antes ang Olympic Games.

Nahibaluan nga may yara na sang nahitso nga mga virus countermeasures ang organizers agud nga mapabilin nga safe ang hampang lakip na ang pagban sa mga overseas fans sa labing una nga tion.

Facebook Comments

bomboradyo