Nagpanugyan ang Mandurriao Police Station sa mga pumuluyo sang syudad sang Iloilo nga may mga salakyan nga indi mag-park sa madulom nga lugar.

Photo from: Marcuz Mark Anthony

Ini ang may kaangtanan sa natabo sa Smallville Complex sa Pison Avenue, Madurriao, sa diin gingisi ang tubo sang salakyan agud nga kawaton ang krudo.

Sa interview sang Bombo Radyo kay Police Lieutenant Alona Layson, Deputy for operation sang Mandurriao PNP, iya ginpahayag nga ginpabalhag sa ila nga istasyon ang pagpangawat sang krudo kag gilayon man sila nga nakig-angot sa mga gwardya sa lugar agud nga malantaw ang closed circuit television (CCTV) footage.

Apang indi man maathag ang kuha sang CCTV camera bangud madulom ang lugar.

Nahibaluan nga ginakakibot sang tag-iya nga gulpi lang napatay ang iya salakyan samtang nagamaneho kag sang ginlantaw, wala na sang krudo kag may gisi na ang tubo sang iya nga salakyan.

-- Web Ads --

Indi lamang isa ka bes nga natabo ang pagpangawat sang gatong sa syudad sang Iloilo bangud, nagpabalhag man si Barangay Kagawad Pacencia Almio sang Magsaysay, La Paz, matapos matukiban nga ginpasuyupan sang wala makilal-an nga mga lalaki ang gatong sa salakyan sang iya nga anak.

Suno kay Kagawad Almio, aga sang nag-park sang salakyan ang iya anak sa atubang sang Ateneo de Iloilo sa Pison Avenue, Mandurriao.

Nagapreparar kuntani ang iya anak nga dal-on sa ospital ang iya nga misis apang sang nagbalik ini sa salakyan, pahayag sang kagawad, nakit-an sang iya anak ang host.

Nakig-angot man sila sa gwardya kag nagtuad ini nga may yara sang nagalingling sa idalom sang salakyan apang wala niya ini ginsapak sa pagdumdom nga tag-iya man lang sang salakyan.

Apang natigayon gid nga makuha sang mga wala makilal-an nga tawo ang ginabanta 10 ka litro sang gatong.

Facebook Comments

bomboradyo