Ginreklamo sang pagpangastigo ang mag- utod nga pulis nga assigned sa Pototon Municipal Police Station sa Iloilo matapos ginpulihan kastigo ang isa ka suspek sa kaso nga attempted murder.

Ang ginreklamo nga mga pulis amo sanday Staff Sergeant Erwin Acosta kag manghod nga si Staff Sergeant Ravelo Acosta.

Sa reklamo ni Emmanuel Adoracion,26,residente sang Primitivo Ledesma Ward, Pototan, Iloilo, iya ginpahayag nga duha ka beses siya nga ginsumbag sa tiyan sang mag- utod nga pulis sang gin-aresto siya sang mga ini bangud sa tuyo nga pagbuno kay Donnil John Peñaflorida,24, sang Primitivo Ledesma Ward, Pototan, Iloilo.

Natabo ang tuyo nga pagbuno sang may nagluntad nga komosyon sa tunga sang magkasilingan nga sanday Adoracion kag Peñaflorida sa nasambit man nga lugar.

Suno kay Adoracion, matapos siya nga gindakop sang mag-utod nga pulis, ginpasakay siya sa patrol car kag padayon nga ginkastigo.

Ginpanginwala naman sang mag-utod nga pulis ang akusasyon batok sa ila ni Adoracion.

Suno sa mag-utod nga pulis,ginkinahanglan nila nga pwersahon si Adoracion bangud nagapakatig-a ini nga mag-upod sa ila.

Sa subong, ginahitso na sang pamilya ni Adoracion sa National Police Commission ang pagpasaka sang kaso nga administratibo batok sa mag-utod nga Acosta.

Facebook Comments

bomboradyo