ILOILO CITY – Gin-athag ni Iloilo City Mayor Jerry Treñas nga wala sang moratorium ang syudad sang Iloilo para sa magapauli nga mga locally stranded individuals (LSIs) kag returning overseas Filipinos (ROFs).

Sa interview sang Bombo Radyo kay Treñas, iya ginpahayag nga batunon gihapon sang syudad ini nga mga residente subong nga holiday season sa kondisyon nga tanan sila ang magapaidalom sa reverse transcription polymerase chain reaction (RT-PCR) test antes makig-upod sa publiko.

Suno kay Treñas, i-libre sang Iloilo City Government ang swab test para sa mga mga LSIs kag ROFs nga indi ma-cover sang pondo sang Philippine Health Insurance Corporation (PhilHealth).

Nagahingyo ang alkalde sa sini nga mga LSIs kag ROFs nga sundon gid ang quarantine protocol ilabi na kun wala pa narelease ang swab test results.

Indi man maadugayan suno sa alkalde ang pagpagwa sang resulta sang COVID-19 test bangud may yara na sang molecular laboratory ang syudad sang Iloilo.

Nahibaluan nga sa probinsya sang Iloilo, madamo nga mga banwa ang may yara na sang approved moratorium para sa mga magapauli nga LSIs subong nga Paskwa kag Bag-ong tuig bangud sa nagagutok nga treatment kag quarantine facilities.

Facebook Comments

bomboradyo