ILOILO CITY- Magalawig sang duha ka semana antes nga ma- finalize ang Local Public Transport Route Plan (LPTRP) sang Iloilo City matapos nga ginbalik ini sang Department Of Transportation para sa pila ka menor nga mga pagbag-o.

Sa interview sang Bombo Radyo kay Butch Peñalosa, head sang City Planning and Development Office, iya ginpahayag nga nalakip sa ginrekomendar nga mga pagbag-o amo ang masunod:

1.ang executive order nga nagatukod sang team nga maga-draft sang LPRTP, ang dapat nga kabahin sang introduction kag indi sang Annex;

2.Survey sang daily number sang public transport passengers kada ruta; kag

3.Correction sa pamaagi sang pagpresentar sang data kag survey results.

Suno kay Peñalosa, tiunguhaan nila nga mapadasig ang pagpatigayon sang survey, sa diin mahimo nga i-tap sang syudad ang transport groups kag magpatigayon sang survey sa mga drivers sa baylo nga pasahero agud nga mas mangin mahapos ini.

Ginpahayag ni Peñalosa nga ang survey magakinahanglan sang duha ka semana para sa mga surveyors sa tanan nga ruta nga nagaeksister sa syudad sa diin magapadala si Mayor Jerry Treñas sang 30 ka personnel agud magbulig.

Wala naman napat-od ni Peñalosa kon san-o liwat mapasa sa DOTr ang nasambit nga
LPRTP.

Ang LTPRP amo ang dokumento nga required sang Department of Transportation (DOTr) paagi sa Land Transportation Franchising and Regulatory Board (LTFRB) gikan sa local government units (LGUs) sang 2017.

Gin-athag naman sang Department of Interior and Local Government- Iloilo City indi kinahanglan ang Local Public Transportation Route Plan (LPTRP) para sa renewal sang tricycle franchise kag sa baylo kinahanglan ini para sa bag-o nga mga application sang franchise.

Matandaan nga sa Joint Memorandum Circular (JMC) No. 001 sang June 19, 2017 DILG kag DOTr, ginmando ang moratorium sa pagbaton sang applications ukon petitions para sa tricycle franchises kon wala pa sang aprubado nga LPTRP.

Facebook Comments

bomboradyo