Ginpakamalaot sang militar ang lapnagon nga protesta nga nagakatabo sa Myanmar kasunod sang kudeta nga ginpatuman sang Pebrero 1.

Sa labing una nga press conference sang militar halin sang natabo ang kudeta, ginpahayag sang spokesman sang militar nga si Brigadier Gen. Zaw Min Tun nga agresibo kag bayolente ang mga demonstrasyon kag protesta.

Suno sa military spokesman, nagahimo sang kalakasan ang mga protesters kag gina-pressure sang iligal ang iban nga mga sibilyan agud magprotesta man sa mga dalanon.

Sang ginpamangkot naman nahanungod sa condition sang gin-detain nga democratic leader nga si Aung San Suu Kyi, ginpahayag ni Zaw Min Tun nga yara siya sa maayo nga health condition.

Photo: Mainichi Japan

Ginpahayag pa ni Zaw Min Tun nga ginaatake man sang mga protesters pati ang police authorities sang damlag lang kag sa pagkamatuod, isa ka pulis ang napatay bangud sang iya naangkon nga mga pilas.

Nahibaluan nga nagapadayon pa tubtob subong ang mga protesta sa Naypyitaw nga amo ang capital sang Myanmar kag sa iban pa nga bahin sang pungsod samtang ginahingyo nga i-release na si Suu Kyi kag iban pa nga mga democratic leaders.

Apang ang ginakahangaw-an subong amo ang epekto sini sa mga medical services bangud nag-upod man sa protesta ang mga medical workers; gani nagakaubusan na sang staff ang mga clinic kag ospital rason nga nagakapektuhan man ang COVID-19 testing.

Sa pagkatamatuod, sa Yangon, nag-untat sang operasyon ang pinakadaku nga medical institution nga amo man kuntani ang naga-conduct sang pinakadamo nga coronavirus tests sa Myanmar.

Facebook Comments

bomboradyo