GUIMARAS – Matapos ang anum ka tuig nga pagpanago kasunod sang nahimo nga krimen, natigayon nga ma-aresto sang mga pulis ang isa ka national wanted person sa banwa sang Sibunag, Guimaras nga amo ang ginatudlo nagpatay sa utod sang isa ka SB Member.

Ang arestado amo si Melgar Galon, 34, residente sang Barangay Alegria, Sibunag, Guimaras.

Nadakpan ini sang mga pulis sa Brgy 8, Bayan Luma, Imus, Cavite.

Sa interview sang Bombo Radyo kay Pol. Lt. Val Cambel, hepe sang Sibunag Municipal Police Station, iya ginpahayag nga natabo ang krimen sang nagligad nga Oktubre 11, 2015 sang ginbuno ni Galon ang biktima nga si Rodolfo Gamarcha.

Natabo ang kinagamo kadungan sang patronal fiesta sang Brgy. Alegria.

-- Web Ads --

Ang biktima ang utod ni SB Member Rolly Gamarcha sang Sibunag, Guimaras.

Sa subong, nakahunong si Galon sa Sibunag PNP.

Naglikaw lang’

Sa interview sang Bombo Radyo kay Galon, nagdepensa ini nga wala ini nalagyo kundi naglikaw lang sa gamo bangud ginagubat sila sa ila nga balay.

Ginpahayag ni Galon nga may sakit sa korason ang iya nga iloy gani nga naglikaw na lang siya sa Cavite agud nga mapalayuan ang pamilya sang iya nga ginpatay.

Ginbalikan sang arestado ang mismo adlaw sang insidente kun sa diin suno sa iya, una nga naggabot sang kutsilyo ang biktima kag una nga nagbuno sa iya apang gin-agaw lang niya ini agud depensahan ang iya nga kaugalingon.

Facebook Comments

bomboradyo