Malapit na lang matapos ang clinical trial sa Pilipinas sa paggamit sang herbal medicine nga lagundi bilang supplement treatment sa mild coronavirus.

Ini ang ginkumpirma ni Dr. Cecilia Nelia Maramba-Lazarte, ang director sang Institute of Herbal Medicine, National Institute Of Health sa UP Manila kag Project Leader sang Efficacy and Safety of Vitex negundo for Mild COVID-19 (EVICT Program).

Sa exclusive interview sang Bombo Radyo kay Lazarte, iya ginpahayag nga may mga follow-ups na lang nga ginatapos sa gamay na lang nga mga pasyente sa Stage 2 sang clinical trial.

Pagkatapos sini, tipunon na ang data kag i-analyze sang mga ekperto kun ano ang epekto sini nga herbal medicine sa mga pasyente nga naga-suprer sang mild COVID-19.

Kun balik-balikan ang Stage 1, may dose finding nga ginpatigayon; ginhibalo kun ano ang kinalain sang high dose sa normal dose nga ginahatag sa mga 200 ka COVID-19 patients nga may mild symptoms sa selected nga quarantine facilities.

Santo sa nangin resulta, natukiban nga ‘halos pareho lang’ ang epekto sang normal dose sa high dose kag minimal lang ang reported nga adverse reactions.

Lakip sa minimal nga adverse reactions amo ang rashes kag diarrhea.

Ang second stage naman sang pagtuon amo ang placebo-controlled clinical trial.

Voice of Dr. Cecilia Nelia Maramba-Lazarte

ANO ANG YARA SA LAGUNDI?

Dr. Cecilia Nelia Maramba-Lazarte

Ang lagundi ang may yara sang anti-inflammatory compound nga mahimo makabulong sa moderate tubtob severe nga inflammation sang COVID-19 patient nga may sintomas nga ginabatyag kaangay sang ubo.

May mga pagtuon man nga nagapahayag nga may yara sang Persiphen kag Vitexin compound nga yara sa lagundi nga mahimo mangin anti-viral properties.

Tun-an suno kay Lazarte kun paano ma-address sang lagundi ang iban nga sintomas sang COVID-19 kaangay sang kabudlay sa pagginhawa magluwas pa sa pagbulig-buhin sini sa virus sa lawas sang tawo.

Ang target gid suno sa doktora amo nga mabuligan ang mga naka-home quarantine lang nga pasyente kag mabulong ang mild coronavirus agud nga indi na maglab-ot sa moderate kag severe cases.

ANO ANG MASUNOD KUN MATAPOS NA ANG SECOND STAGE SANG TRIAL?

Voice of Dr. Cecilia Nelia Maramba-Lazarte

Target nga ma-analyze na ang resulta sa masunod nga mga semana.

Kun bastante na ang data suno kay Dr. Lazarte, ipasa na ini dayon sa Food and Drug Administration (FDA), Department of Science and Technology (DOST), kag Department of Health (DOH).

Matandaan nga Hulyo 2020 sang gin-anunsyo nga gin-aprubahan sang DOST-Philippine Council for Health Research and Development ang clinical trial sa lagundi. Agusto 2020 naman sang naghatag ang FDA sang approval sa clinical trials sa lagundi bilang supplemental treatment batok sa COVID-19. # 

Facebook Comments

bomboradyo