ILOILO CITY- Ginapasiguro sang Vice Chairman sang Committee on Constitutional Amendments sa kamara nga indi madagtaan sang pulitika ang ginaduso nga charter change agud bayluhan ang economic provisions sa 1987 Constitution.

Sa interview sang Bombo Radyo kay Iloilo 3rd District Representative Lorenz Defensor, iya gintuad nga may mga mamalidha nga lain ang ginaduso magluwas sa pag-amyendar sa restrictive economic provisions bilang sabat sa epekto sang COVID-19 pandemic sa ekonomiya sang pungsod.

Suno kay Defensor, sa tion nga intrahan ini sang pulitika, pat-ud nga indi pagsuportahan sang mga pumuluyo ang ini nga mga amyenda.

May kaangtanan naman sa isyu nga ‘wrong timing’ ang ginaduso nga charter change bangud nga may ginaatubang pa nga pandemya ang pungsod, ginpahayag sang mamalidha nga bastante ang pwersa sang kamara agud nga matatapan ini tanan.

Nahibaluan nga ang Resolution of Both Houses No. 2 nga gin-file ni House Speaker Lord Allan Velasco sang 2019 bilang basehan sang deliberasyon ang nagaduso sang liberalisasyon sang probisyon sa ekonomiya nga ginalakipan sang Article 12 (National Patrimony and Economy), Article 14 (Education, Science, Technology, Arts, Culture and Sports) kag Article 16 (General Provisions).

Ang tikang nagatuyo nga isal-ot ang mga tinaga nga “unless otherwise provided by law” sa pila ka seksyon sang konstitusyon nga nagadumili sang foreign ownership sa duta, mga dunang manggad, public utilities, educational institutions, media kag advertising.

Facebook Comments

bomboradyo