Ginpamatukan sang University of the Philippines Visayas (UPV) ang pagbasura ukon pagterminate sang Department of National Defense (DND) sa 1989 UP-DND Accord nga amo ang kasugtanan nga nagadumili sang pagsulod sang militar kag pulis sa mga campus sang University of the Philippines kun wala sang notice sa talatapan sang UP.

Ini ang kasunod sang ginpadala nga sulat ni Defense Secretary Delfin Lorenzana kay UP President Danilo Concepcion kag nagpahayag nga kinahanglan ang abrogation agud nga mas mahapos para sa pulis kag militar nga proteksyunan ang mga kabataan gikan sa ginapahayag recruitment sang Communist Party of the Philippines kag armed wing sini nga New People’s Amy.

Sa exclusive interview sang Bombo Radyo kay Clement Castigador Camposano, Chancellor sang UP Visayas, iya ginpahayag nga wala ginadeny sang administrasyon sang ila Unibersidad nga may mga estudyante sila nga nangin rebelde.

Apang sa pagkamatuod suno kay Camposano, bisan sa diin lamang nga Unibersidad ukon institusyon, may yara sang rebelde nga mga tawo.

Suno sa iya, indi mahimo nga makontrol sang isa ka sektor ukon tawo ang kinamatarong sang isa man ka tawo kun ano ang mangin desisyon sini sa iya nga kabuhi.

Magluwas sini, ginkasubo ni Camposano nga indi patas ang mga pamatok sa ila bangud tuman ka dako ang nangin kontribusyon sang ila institusyon sa sosyudad kag sa pungsod Pilipinas.

“Ka-unfair bala nga despite of what we have done and despite the fact that UP has been producing all kinds of talents that they can still make these kinds of alegations,” pahayag ni Camposano.

Indi man rasonable suno kay Camposano ang alegasyon nga ginahaboy sa ila sa diin ginapahayag nga ginabalayan sang mga kaaway sang estado ang ila nga Unibersidad.

“Ka balik-awot gid nga reasoning. Ang problema lang sini, paano ka magpaathag sa mga tawo nga daw sarado na ang paminsaron. Pero kami nagapati nga kun tagaan lang nila kami sang kahigayunan nga magpaathag man kag bukas ang ila paminsaron, makita man nila nga indi gid nagakaangay nga maghimo kita sang alegasyon nga ang Unibersidad sang Pilipinas ang number 1 promoter or recruiter sang mga komunista ukon may systematic recruitment sang mga estudyante,” dugang pa ni Camposano.

Ginpaathag niya nga padayon nila nga tindugan ang ila kinamatarong nga kun wala sang lawful reason ang mga otoridad sa pagsulod sa ila nga mga campus, indi gid nila ini pagpahanugutan nga makasulod.

Suno sa natungdan, maka-kaladlawan ang nangin rason sang DND nga katuyuan lamang sang abrogation amo ang proteksyunan ang ila mga estudyante.

“Protect our students for what? From ideas they don’t like? from ideologies that they find strange? from advocacies they can’t understand? that’s really funny, it’s laughable.”

“Kun ang adbokasiya sang isa ka grupo, wala naga-angot sa imo ginapatihan, wala ka sang rason nga hambalon sila nga terorista, kay wala sila nagapati sang imo ginapatihan,” dugang pa ni Camposano.

Ang katuyuan suno kay Camposano sang ila kasugtanan, indi amo ang i-give up ang special treatment sa ila Unibersidad bangud wala man sila nagaclaim sang espesyal nga pribilehiyo ukon treatment.

“The purpose of Accord is not to give up any special treatment. That is not the intention at all. UP is a special institution, but we are not claiming any special privileges or special treatment.”

Nagakaangay lamang suno sa iya nga hilway ang mga Unibersidad sa mga pagpasilabot sang kapulisan.

“Ang mission sang isa ka Unibersidad amo ang pagbaid sang kinaalam sang mga estudyante. Indi mo ina mahimo kun ang isa ka eskwelahan indi hilway nga makapagdiskurso, makapagdebate, indi mahasa, indi mabaid ang kinaalam sang isa ka estudyante. Kun sinsero sila nga protektahan ang youth, then they should do everything to ensure that our youth get the education that they deserve. Without the democratic space that our campuses can afford, then our students will never get that quality education that they so badly deserve.”

Sa pihak sini, tuman ang pagpasalamat ni Camposano nga may mga myembro sang senado nga nagapamatok sa ginhimo sang Department of National Defense nga pagbasura sang ila kasugtanan.

Matandaan nga ginpangunahan ini ni opposition Senator Francis “Kiko” Pangilinan sa diin nag-file ini sang Proposed Senate Resolution (PSR) No. 616.

Ang anum ka iban pa nga mga senador nga nagpirma sa resolution amo sanday Senators…

  • Risa Hontiveros
  • Nancy Binay
  • Ralph Recto
  • Leila de Lima
  • Franklin Drilon
  • Joel Villanueva

Sa amo nga resolution, ginhingyo sang mga senador sa Department of National Defense kag sa UP nga magsapol kag mag-istorya nahanungod sa peace and security kag ang pagproteher sa academic freedom.

Ginahingyo man ang Senado nga magpanindugan agud balabagan ang akto ni Defense Secretary Delfin Lorenzana nga ibasura na ang UP-DND accord nga amo ang nagaproteher sa mga estudyante sa campus militarization.

Facebook Comments

bomboradyo