Wala sang may napilasan sa bahin sang militar sa engkwentro nga nagluntad batok sa mga miyembro sang New People’s Army sa Barangay Tigmarabo, Miagao, Iloilo.

Sa interview sang Bombo Radyo kay Pol. Col. Gilbert Gorero, director sang Iloilo Police Provincial Office (IPPO), iya ginpahayag nga pasado 1:00 kaina sang hapon sang natabo ang insidente samtang nagapatigayon sang community security patrol ang tropa sang militar.

Kapin 40 ka mga rebelde ang nakit-an kag ginapatihan nga miyembro sang Southern Front Komiteng Rehiyon Panay sang New People’s Army.

Lakip sa narecover sa lugar nga ginluntaran sang engkwentro amo ang isa ka 12 gauge shotgun, isa ka homemade shotgun, isa ka hand grenade, 10 ka backpacks, 1 ka projector, 2 ka keypad cellphones, 2 ka improvised explosive device, 1 ka binocular, kag subversive documents.

Ginahibalo pa kun may yara sang napilasan ukon casualty sa bahin sang mga rebelde.

Kahapon man nga adlaw, Disyembre 26, amo man ang ika-52 anyos nga anibersaryo sang Communist Party of the Philippines (CPP).

Apisar na ang ila selebrasyon, wala nagapakampante ang mga pulis suno kay Gorero bangud traidor ang mga rebelde suno sa iya.

Posible nga taktika suno kay Gorero amo ang pag-ambush sa mga dalanon bangud nahibal-an man sang mga rebelde nga naka-heightened alert subong ang mga police stations.

Nagapanawagan man si Gorero sa mga pulis nga magpabilin nga alerto.

Facebook Comments

bomboradyo