ILOILO CITY- Sapulon ni Iloilo Governor Arthur Defensor Jr. ang tanan nga mga alkalde sa Probinsya sang Iloilo matapos nga napirmahan na ang kasugtanan sa British-Swedish multinational pharmaceutical kag biopharmaceutical company nga AstraZeneca agud magbakal sang COVID-19 vaccine.

Sa interview sang Bombo Radyo kay Defensor, iya ginpahayag nga P65M ang ginpain sang probinsya para sa purchase price sang bakuna nga igahatag sa mga frontliners sa tagsa ka munisipalidad.

Suno sa gobernador, ang mangin masunod nga tikang sang probinsya amo ang pagbalay sang executive order para sa detalye sang implementasyon sang vaccination plan sa probinsya.

Gin-athag man sang gobernador nga magluwas sa bakuna nga libre nga ihatag sang probinsya sa kabanwahanan, mahimo man nga makabakal ang tagsa ka Local Government Unit sang kaugalingon nga bakuna para sa ila pumuluyo.

Nahibaluan nga inisyal nga magabakal ang Iloilo Province sang 270,000 nga doses sang COVID-19 vaccine.

Samtang, sa bahin naman sang mga pribado nga sektor ukon kompaniya nga magabakal sang kaugalingon nga bakuna para sa ila empleyado, ginpahayag ni Defensor nga mahimo magsulod sa multilateral agreement ini nga mga kumpaniya upod sa national government apang indi pa maathag sa gobernador kon paano ini patigayunon sa Iloilo.

Facebook Comments

bomboradyo