ILOILO CITY – Gin-aprubahan na sang Iloilo City Council ang prangkisa nga ginhingyo sang United Association of Cockpit Owners and Operators of the Philippines, Incorporated nga magpatigayon sang online nga bulang.

Ang UACOOP ang nagikan sa Mandaluyong, City kag ginapanag-iyahan ni Eric dela Rosa.

Sa interview sang Bombo Radyo kay Councilor Jojo Javellana nga amo ang chair sang Committee on Games, Amusement, and Professional Sports sa Iloilo City Council, iya ginpahayag nga aprubarado na sang Sangguniang Panlungsod ang ordinansa nga nagahatag sang isa lamang ka tuig nga prangkisa.

Ang prangkisa ang yara sa probation ukon subject pa sa kritikal nga eksaminasyon kag evaluation.

Apang mahimo nga mapahanugutan ang nasambit nga operator nga makapatigayon sang delayed broadcast sang bulang sa diin recorded na ini antes nga i-stream online sa syudad sang Iloilo.

Matandaan nga kadungan sini, gin-athag ni Javellana nga ginapatuman pa sa gihapon ang Resolution 79, Series of 2020 sang Inter-Agency Task Force kun sa diin nakasaad nga ginapasugtan ang cockfighting operations sa mga lugar nga yara sa Modified General Community Quarantine apang subject pa sa istrikto nga health kag safety protocols.

Sa idalom sini nga pagsulundan, indi pwede ang in-person audience, online ukon remote betting, kag pati na ang live broadcasting ukon telecasting sang cockfights.

Facebook Comments

bomboradyo