Nagakadapat nga ma-immune ang tanan sa COVID-19 agud malimitahan kag mapauntat ang paglapta sini.

Ini ang hugot nga ginaduso sang Philippine College of Physicians Western Visayas-Panay Chapter.

Sa interview sang Bombo Radyo kay Dr. Aime Fabila, presidente sang Philippine College of Physicians Western Visayas-Panay Chapter, iya ginpahayag nga nagakadapat nga mag-angkon ang 70 percent nga populasyon sang pungsod sang acquired immunity.

Ang acquired immunity ang makuha pinaagi sa pagpabakuna batok sa COVID-19.

Ang natural immunity naman ang natural nga antibodies nga ginaproduce sang lawas sang tawo apang ini ang makabig nga kulang sa pagpakig-away batok sa COVID-19.

Ang COVID-19 vaccine ang nagatudlo sa lawas sang tawo nga batuan kag likawan ang amo nga virus.

Nagapati si Fabila nga ang pagpabakuna batok sa COVID-19 ang dako nga pamaagi agud mapauntat ang pandemya.

Samtang suno naman kay Dr. James Catoto, isa sa mga board of director sang Philippine College of Physicians Western Visayas-Panay Chapter, yara na sa stage 3 sang clinical trial ang COVID-19 vaccine sa diin ginatestingan na ini sa minilyon nga tawo sa kalibutan agud matumod ang pagka-epektibo sini.

Sa interview sang Bombo Radyo kay Dr. Catoto, iya ginpahayag nga ang COVID-19 vaccine ang may yara sang attenuated virus kag spike protein nga nagahatag sang immunity nga nagabulig sa paglikaw sa isa ka indibidwal nga matapikan sang virus.

Apang ang kadasigon sa pagdevelop sang immunity ang nakadepende sa kondisyon sang lawas sang tawo.

Ginapahayag sang natungdan nga samtang wala pa nalab-ot sang pungsod ang pagpabakuna sa 70 percent sang populasyon, nagakadapat nga indi magkampante ang mga nakabaton na sang vaccine kag istrikto sa gihapon nga magsunod sa tanan nga health protocol.

Matandaan nga santo sa World Health Organization, posible nga matapikan sang COVID-19 ang isa ka indibidwal nga vaccinated apang indi mangin severe ukon malala ang kondisyon.

Facebook Comments

bomboradyo