ILOILO CITY- Nagalab-ot sa masobra P30M ang ginaalegar pag-overprice sa mga heavy equipment nga baklon sang Local Government Unit sang banwa sang Dumangas, Iloilo.

Sa interview sang Bombo Radyo kay Sangguniang Bayan Member Ian Dolendo, iya ginpahayag nga matapos nila ginbusisi ang presyo sang mga equipment nga baklon kuntani sang banwa gikan sa manufacturer nga AVANTRAC, natukiban nga triple ang presyo sang mga equipment kon ikumpara sa presyo sang iban nga manufacturer.

Suno kay Dolendo, yara lang sa P2.5M ang unit cost sang isa ka 6-wheeler dump truck sa duha ka iban nga manufacturers nga HOWO/HOMAN kag SINOTRUK/LONKING apang nagalab-ot naman sa masobra P8.5M ang presyo nga iya sang AVANTRAC.

Pahayag pa sang opisyal, kon sumahon ang presyo sang baklon nga equipment sa AVANTRAC nga ginalakipan sang duha ka brand new 6-wheeler dump truck, isa ka brand new nga 6-wheeler garbage compactor, isa ka brand new nga 4 by 4 backhoe loader, isa ka brand new nga 6-wheeler mini dump truck, kag isa ka brand new nga generator set, nagalab-ot ini tanan sa P45M.

Apang kon presyo sang HOWO/HOMAN kag SINOTRUK/LONKING ang basehan, nagalab-ot lang ini sa kapin P11.5M.

Nahibaluan nga sa ginpatigayon nga bidding para sa pagprocure sang mga heavy equipment, nagdaog ang AVANTRAC nga nabase sa Cebu kontra sa HOWO/HOMAN kag SINOTRUK/LONKING nga nabase naman diri sa syudad sang Iloilo.

Kwestiyonable naman suno kay Dolendo kon ngaa ginpasugtan ni Dumangas Mayor Ronaldo ‘Onal’ Golez ang pagbakal sa nasambit nga overpriced equipment sa balor nga P45M nga mahimo man lang kuntani mabakal sa kapin P11.5M.

Nahibaluan nga nagloan ang banwa sang P50M para sa pagbakal sang nasambit nga mga equipment apang may separado pa gid nga pondo nga ginpain ang banwa nga P800,000 para sa balayran sa duties, taxes kag insurances sang nasambit nga equipment.

Bukas naman ang Bombo Radyo para sa sabat ni Dumangas Mayor Ronaldo ‘Onal’ Golez tuhoy sa kontrobersiya.

Facebook Comments

bomboradyo