ILOILO CITY- Ginkaakig ni anay Health Secretary kag subong Iloilo 1st District Rep. Janette Garin ang iya natukiban nga pag-usik sang P22 million nga budget nga gintigana para sa pagbakal sang dengue test kits.

Sa exclusive interview sang Bombo Radyo Iloilo kay Rep. Garin, iya ginpahayag nga gin-gamit ang nasambit nga pondo para sa wala sang pulos nga mga meetings kag seminar.

Suno kay Garin, masubo panumdumon nga ang pondo nga para kuntani sa mga biktima sang dengue sa mga lugar sa pungsod nga may yara sang dengue outbreak ang gin-uyangan lang.

Ginkwestiyon naman ni Garin ang pag-appoint ni Department of Health Secretary Francisco Duque kay Calabarzon regional health director Eduardo Janairo bilang national dengue task force head.

Suno kay Garin, kulang sa qualifications si Janairo bangud indi man ini isa ka infectious disease specialist.

Samtang, base sa mga dokumento nagikan sa bids and awards committee, gintuad ni Garin nga kasunod sang appointment kay Janairo, na-divert man ang nasambit nga pondo sa Calabarzon.

Suno pa kay Garin, matapos ginkansela ang pagbakal kuntani sa mga dengue test kits nga nagabalor sang P22 million, gin-gamit ang pondo para sa meetings kag seminars kun sa diin ginkuha sang national dengue task force ang serbisyo sang Vireo Loadworks Inc., paagi sa experts panel meetings agud magpatigayon sang monitoring sang dengue vaccines kag vaccine preventable diseases.

Naghingyo naman si Garin sa Department of Health nga hingyuon sa Commission on Audit nga magpatigayon sang special audit sa mga transactions sang Center for Health Development sang Calabarzon bangud sa paggamit sang pondo sa wala pulos nga butang.

Nahibaluan nga sa ginpatigayon nga 2020 budget hearing para sa budget sang Department of Health sang ginbuyagyag ni Garin ang nasambit nga kontrobersiya.

Facebook Comments

bomboradyo