Ginmanduan na sang Energy Regulatory Commission (ERC) ang Philippine Electricity Market Corporation (PEMC) nga pauntaton ang pagpasaka sang presyo sang kuryente sa Western Visayas.

Nahibaluan nga ang rason sang pagsaka sang presyo sang kuryente amo ang pagkaguba sang submarine cable sang National Grid Corporation of the Philippines (NGCP) sa Amlan, Negros Oriental matapos ang ginpatigayon nga dredging operation sang Department of Public Works and Highways.

Sa interview sang Bombo Radyo kay Iloilo City Lone District Rep. Julienne ‘Jamjam’ Baronda, iya ginpahayag nga nagapasalamat sila sa ERC nga ginpamatian ang ila panawagan nga aktuhan ang isyu sa pagsaka sang kuryente bangud mabug-at ini nga palas-anon para sa mga konsumidor nga wala man sang sala sa pagkaguba sang submarine cable nga amo ang nangin rason sang pagnipis ukon limitado nga power supply.

Ginmanduan man sang ERC ang Philippine Electricity Market Corporation nga i-refund sa mga konsumidor ang charges nga nagdugang sa ila bill humalin sang Hunyo tubtob Agusto, 2021 kag pauntaton ang koleksyon sang congestion charges kag iban pa nga applicable charges samtang wala pa nakaayo ukon na-restore ang naguba nga linya sang kuryente.

Facebook Comments

bomboradyo