EMB kag DENR, padayon nga gina-imbestigahan ang gintunaan sang duag green nga tubig nga naga-gwa sa bomba sang mga taga-Bolilao, Mandurriao

Padayon nga gina-imbestigahan sang Environmental Management Bureau (EMB) kag Department of Environment and Natural Resources (DENR) ang duag green nga tubig nga naga-guwa sa bomba sang mga residente sang Barangay Bolilao, Mandurriao, Iloilo City.

Sa interview sang Bombo Radyo kay Engineer Noel Hechanova, pinuno sang City Environment and Natural Resources Office (CENRO), iya ginpahayag nga posible nga sa masunod nga semana, makapadala na sang sabat ang nasambit nga mga ahensya kun ano ang gintuaan sang paglain sang duag sang tubig.

Suno kay Hechanova, mas maayo nga indi anay paggamiton sang pumuluyo ang tubig nga nagaggwa sa ila nga bomba bangud posible nga makahalit ini sa ikaayong lawas.

Nagakadapat man nga ipalayo man ini sa mga kabataan bangud kun ma-inom, posible nga tunaan ini sang madamo nga balatian bangud indi pa matumod kun ano nga kemikal ang nagsimpon sa tubig.