ILOILO CITY – May dugang nga COVID-19 vaccines nga magaabot sa syudad sang Iloilo subong nga semana nga magahalin sa national government.

Wala lang sang ideya si Mayor Jerry Treñas kun daw ano ka damo nga doses ang ihatag sa Iloilo City Government apang padayon ang iya pagpakig-angot kay vaccine czar Secretary Carlito Galvez Jr..

‘Totally dependent’ pa subong ang city government sa national government bangud wala pa man nakaabot ang bakuna nga ginprocure sang syudad.

Sa interview sang Bombo Radyo kay Treñas, iya ginpahayag nga kun mag-abot ang bakuna subong nga semana, padayunon ang inoculation sa mga senior citizens kag immunocompromised individuals.

May mga health workers man nga nabilin pa nga dapat bakunahan.

Suno sa alkalde, ‘kun madamo na’ ang mabakunahan sa senior citizens kag immunocompromised individuals, igasunod ang economic sector.

Sang nagligad nga semana, may vaccine rollout nga ginpatigayon sa Central Philippine University kag SM City sa Mandurriao kun sa diin kabug-usan nga 3,998 ka first doses ang na-administer.

PHOTO: CMO

Duha na lang kuntani kag malab-ot ang target nga 4,000 apang ginapahayag nga may problema sa syringe.

Dala diri nga numero sang nabakunahan amo ang mga senior citizens kag immunocompromised individuals, mga punong barangay, mga katapo sang Barangay Health Emergency Response Teams (BHERTs), kag mga opisyal sang syudad lakip na si Treñas.

350,000 tubtob 400,000 ang target nga mabakunahan sa syudad sang Iloilo agud malab-ot ang herd immunity.

Gina-engganyo sang Iloilo City Government ang tanan nga mga residente nga magparehistro man para sa vaccination bangud unahon ang mga tawo nga naka-pre-register kun mag-abot ang vaccines nga gin-procure sang syudad.

Facebook Comments

bomboradyo