ILOILO – Nag-umpisa na sa pagpatuman sang suggested retail price (SRP) ang Department of Trade and Industry (DTI) sa mga school supplies.

Sa interview sang Bombo Radyo kay Ma. Dorita Chavez, account officer sang DTI, iya ginpahayag nga may yara sang mga items nga nagtaas ang presyo kag may yara naman sang presyo nga wala sang paghulag humalin sang tinalikdan nga tuig.

Suno kay Chavez, may yara man sang patigayunon nga inspeksyon sa mga manugbaligya sang school supplies agud nga mahibaluan kun bala ginasunod ang SRP.

Kun may yara naman sang mga establisimento nga wala nagatuman sa SRP sa mga school supplies, ini ang imbestigahan sang DTI kag hibaluon kun ngaa nagapataas sila sang presyo.

Ginpasalig man ni Chavez ang publiko nga mahimo magnubo ang presyo sang school supplies samtang nagahilapit ang pagbukas sang klase bangud nga bastante ukon madamo ang mga supplies sa subong nga tuig.

Panugyan sang DTI, indi na maghulat pa sa last minute shopping sa baylo nga samtang timprano pa, magbakal na gilayon sang mga kinahanglanon sang estudyante.

Nahibaluan nga mabukas na ang klase sa Hunyo 3.

Facebook Comments

bomboradyo