ILOILO CITY- Naglab-ot na sa 13, 300 family food packs nga nagabalor P6.3M ang napanagtag sang Department of Social Welfare and Development (DSWD) Region 6 sa Iloilo City kag Province bilang ayuda sa tunga sang ginapatuman nga Enhanced Community Quarantine(ECQ).

Sa interview sang Bombo Radyo kay May Castillo, DSWD- Region 6 spokesperson, iya ginpahayag nga sa nasambit nga food packs, 5,000 foodpacks ang ginhatag sa Iloilo City, 500 sa Cabatuan, 500 sa Leon, 1000 sa Concepcion, 800 sa Tigbauan, 2000 sa Sara, 1500 sa Miagao, 1000 sa San Dionisio,500 sa Tubungan, kag 500 sa Oton.

Suno kay Castillo,ang iban nga Local Government Units (LGU) ang natalana man nga magkuha sang nakapartinisir nga food packs para sa ila pumuluyo subong kag masunod nga inadlaw.

Ginpahayag sang natungdan nga ang tagsa ka LGU amo ang nagapasa sang request kag ang DSWD naman ang nagapain sang food packs depende sa available resources.

Gin-athag man niya nga augmentation lang ang papel sang DSWD sa sini nga ayuda bangod mayor nga katungdanan ini sang LGU.

Nagalaum man ini nga maaprubahan na ang proposal sang ahensya para sa cash assistance sa mga pumuluyo.

Sa subong, ginapapreparar na ang tagsa ka LGU sang ila system agud madasig ang distribution sang cash assistance sa tion nga ini ang maaprubahan na.

Facebook Comments

bomboradyo