ILOILO – Pilason ang driver sang isa ka multicab matapos nagbunggo sa ceres sa Barangay Culasi, Ajuy, Iloilo.

Ang driver sang multicab amo si Grenhen Asturias, 42, kag residente sang Punta Luis, Concepcion, Iloilo.

Samtang ang driver naman sang ceres amo si Marlon Rosal, 44, kag residente sang Barangay Salvacion, Balasan, Iloilo.

Sa interview sang Bombo Radyo kay Pol. Lt. Danillo Noca, hepe sang Ajuy Municipal Police Station, iya ginpahayag nga madasig ang pagpadalagan kag nasobrahan sang liko si Asturias sa kurbadahon nga bahin sang dalan, rason nga gilayon ini nagbunggo sa nasugata nga ceres nga nagapadulong sa syudad sang Iloilo.

Suno kay Noca, nawasak ang ginamaneho nga multicab ni Asturias, samtang nagkalaguba naman ang pila ka bahin sang ceres.

Nag-angkon si Asturias sang pilas sa duha ka tiil kag pagpalanakit sang dughan.

Samtang, maswerte nga wala nasamaran ang driver sang ceres lakip na ang tatlo ka mga pasahero.

Sa subong, padayon pa nga ginabulong ang driver sang multicab sa Sara District Hospital.

Facebook Comments

bomboradyo