Posible nga sa Pebrero ukon sa Marso pa makapagwa sang desisyon ang mga organizers sang Tokyo Olympics kun pahagutan na ang mga tawo nga live nga magalantaw sang mga hampang sa Olympics.

Matandaan nga gindesisyunan sang Japanese government kag sang International Olympic Committee nga ipaiway anay ang 2020 Olympics bangud sa pandemya amo nga ginhalin ini sa Hulyo 2021.

Subong nga tuig, nagapanindugan ang mga organizers nga dayunon na ang aktibidad apisar padayon nga nagataas ang kaso sang COVID-19 sa Japan kag apisar may anunsyo ang gobyerno nga palawigon ang state of emergency bangud sa wala untat nga paglaton sang balatian.

Bangud sini, may mga ticket holders na nga nagpahayag nga indi na sila maglantaw gani nga nagaapply na sila para sa refund.

Suno naman kay Tokyo 2020 Organizing Committee President Yoshiro Mori, tuman ka budlay ang pagdesisyon para sa ila gani lauman nga sa masunod nga bulan pa isapubliko ang ila nga desisyon.

Una diri, nagpahayag na si senior International Olympics Committee member Dick Pound nga dapat hatagan sang priority access ang mga atleta sa bakuna agud madayon ang ila Games sa Hulyo 23.

Facebook Comments

bomboradyo