Nagapakig-angot na ang Department of Agriculture sa Ministry of Agriculture and Food sa pungsod Vietnam para sa mga trial sang bakuna batok sa African swine fever (ASF).

Suno kay Agriculture Secretary William Dar, may bakuna na ang Vietnam nga ginagamit batok sa ASF kag amo sini ang target sang ahensya nga makapatigayon sang trial sa Pilipinas.

Ang ASF amo ang ginapahayag sang mga eksperto nga rason kun ngaa ginakulang ang suplay sang baboy sa pungsod.

Ini man ang ginapahayag sang hog raisers nga nagaapekto sa ila negosyo kag nagapamahal sang presyo sini sa merkado.

Suno kay Dar, nagdangat na sa 500,000 ka mga baboy ang ginpatay bangud nainfect sang ASF kag bangud sini, pinakaapektado amo ang backyard hog raisers.

Natapos naman ang paghimo sang rapid test kits para sa African swine fever sa Central Luzon State University kag maga-mass produce na ang ahensiya umpisa sa bulan sang Pebrero.

Labi man nga ginapasangkad ang monitoring kag surveillance, pati na ang quarantine checkpoints agud masigurado nga wala sang frozen meat nga may ASF nga makasulod sa Pilipinas.

Facebook Comments

bomboradyo