Gin-athag sang Commission on Elections (Comelec) nga wala na sang extension ang voter registration period sa Iloilo City kag Province.

Sa interview sang Bombo Radyo kay Atty. Wilfred Jay Balisado, Director sang COMELEC Region VI, iya ginpahayag nga nahangpan nila nga may yara sang ”one time, big time” nga lockdown sa syudad kag probinsya sang Iloilo sa diin halos tatlo ka bulan nga na-delay ang voter registration.

Apang santo sa ila nangin assessment suno kay Balisado, indi na nila mapalawig pa ang registration period bangud may yara sila sang istrikto nga timeline nga ginasunod antes ang 2022 elections.

Bangud sini, gina-abisuhan nila ang publiko nga maghingagaw sa pagparehistro bangud gina-extend na tubtob Sabado ang registration indi lang sa satellite sites kundi pati na sa mga mall.

Gin-athag man sang natungdan nga indi magnubo sa 1,100 ka indibidwal lang ang ila ma-akomodar sa kada registration site bangud limitado lang ang ila personnel kag ginalikawan ang transmission ukon ang paglatnanay sang COVID-19.

-- Web Ads --

Nahibaluan nga tubtob na lang sa Septyembre 30 ang voter registration sa syudad kag probinsya sang Iloilo.

‘ABISO SA MGA MAGAPADALAGAN SA 2022 ELECTIONS’

Gina-abisuhan naman sang Commission on Elections (Comelec) ang mga kandidato nga magapadalagan para sa 2022 elections nga kompletuhon ang certificates of candidacy (COCs) antes ipasa sa ahensya sa Oktubre 1 tubtob 8, 2021.

Sa interview sang Bombo Radyo kay Atty. Wilfred Jay Balisado, Director sang COMELEC Region VI, iya ginpahayag nga nagakadapat nga natsikyar na sang maayo sang mga kandidato ang ila COCs, kag napa-notaryohan antes ipasa sa COMELEC.

Suno kay Balisado, ang official candidates naman sang political parties nga mapaslawan sa pagpasa sang ila Certificate of Nomination and Acceptance (CONA) sa tion sang eight-day filing period, ang ikonsidera nga independent bets.

Gin-athag man sang natungdan nga sa filing of candidacy, indi requirement ang negative reverse transcription polymerase chain reaction (RT-PCR) test kag ang vaccination card.

Facebook Comments

bomboradyo