Magapatigayon sang kaugalingon nga imbestigayon ang Commission on Human Rights (CHR) sa natabo nga pagluthang-patay sang isa ka ginapahayag hubog nga pulis sa 52 anyos nga babaye sa Quezon City.

Gintawag sang CHR nga traumatic kag alarming ang viral video kun sa diin nakit-an gid kun paano patal nga ginluthang sa liog sang pulis nga si Police Master Sgt. Hensie Zinampan ang biktima nga si Lilybeth Valdez.

Si Zinampan ang na-assign sa Police Security Protection Group.

Suno kay CHR spokesperson Jacquelyn de Guia, bangud sa ginhimo sang pulis, daw kaangay nga nabuhi liwat ang hitabo sang nagligad nga Disyembre 2020 kun sa diin ginpatay man sang pulis nga si Police Staff Sgt. Jonel Nuezca ang iya mag-iloy nga kasilingan sa Paniqui, Tarlac bangud gid lamang sa boga.

Gina-welcome sang CHR ang ginpasalig nga imbestigasyon sang Philippine National Police apang nagpahayag nga kinahanglan ang independent investigation paagi sa ila nga ahensya.

Sa bahin sang Malacanang, ginpahayag ni Presidential Spokesperson Atty. Harry Roque nga indi dapat pag-igeneralize ang hanay sang PNP bangud lamang sang ginhimo ni Zinampan.

Suno kay Roque, may yara gid sang ‘bad egg’ sa kada organisasyon apang nagapati siya nga professional sa gihapon ang PNP.

Facebook Comments

bomboradyo