ILOILO CITY- Nagpatigayon sang pagsinapol ang political groups sa kamara agud suportahan ang Resolution of Both Houses No. 2 (RBH 2) nga nagahatag sa kongreso sang gahom agud amyendaran ang restrictive economic provisions nga nasaad sa 1987 Constitution.

Ang nasambit nga pagsinapol ang gintambungan sang mga partido kag blocs sa kamara nga ginalakipan sang PDP-Laban, Nacionalist People’s Coalition, Nacionalista Party, National Unity Party, Lakas-NUCD, Hugpong ng Pagbabago, Liberal Party, kag Party-list Coalition Foundation Inc.

Sa interview sang Bombo Radyo kay AAMBIS-OWA Partylist Rep. Sharon Garin, iya ginpahayag nga may yara sang mapag-on nga consensus sa mga lideres sa kamara nga suportahan ang inisyatibo ni House Speaker Lord Allan Velasco
nga nagaduso sang liberalisasyon sang probisyon sa ekonomiya nga yara sa konstitusyon.

Suno kay Garin, pila sa ginatuyo nga amyendaran amo ang Article 12 (National Patrimony and Economy), Article 14 (Education, Science, Technology, Arts, Culture and Sports) kag Article 16 (General Provisions).

Ginpahayag sang mamalidha nga ang tikang nagatuyo nga isal-ot ang mga tinaga nga “unless otherwise provided by law” sa pila ka seksyon sang konstitusyon nga nagadumili sang foreign ownership sa duta, mga dunang manggad, public utilities, educational institutions, media kag advertising.

Suno pa sa natungdan, ang ginaduso nga mga amendments ang magasentro lang sa mga probisyon nga naangot sa ekonomiya bilang sabat sa epekto sang COVID-19 pandemic sa ekonomiya sang pungsod kag indi pagpahilabtan ang probisyon nga naangot sa pulitika.

Ini ang botohan naman sang senado kag kamara sa diin 75 porsyento sang kabilugan nga boto ang kinahanglan, mahimo na nga makaproponer sang amendments sa economic provisions.

Sunod nga ipaagi ini sa isa ka plebisito kag kun paboran sang publiko, magadepende na sa masunod nga liderato sang kongreso nga ipresentar ini nga mga layi sa pagbukas sang public utility ownership sa mga dumuluong.

Facebook Comments

bomboradyo