ILOILO CITY- Liwat nga nagpaandam ang Bureau of Animal Industry Region 6 nga likawan ang pagbakal ‘online’ sang mga karne sang baboy bangod posible nga halin ini sa mga lugar nga apektado sang African Swine Fever.

Sa interview sang Bombo Radyo kay Dr. John Roel Hilario, Regional Veterinary Quarantine Officer sang Bureau of Animal Industry Region 6,iya ginpahayag nga kinahanglan nga labi nga mahinalungon ang mga pumuluyo sang Western Visayas ilabi pa nga nakalab-ot na sa area sang Leyte ang African Swine Fever.

Suno kay Dr. Hilario, mas maayo nga lokal nga karne sang baboy na lang ang konsumuhon sang mga pumuluyo bangod magluwas nga barato, mas safe ini.

Nagpaandam man ini sa mga negosyante nga mahimo magpalusot sang pork products gikan sa iban nga rehiyon nga magluwas nga kumpiskaron ang ila mga baligya, mahimo man nga i-suspend ang ila lisensya kag ang registration sang mga transport carriers.

Sa subong suno kay Hilario, may yara sang 1.2 million nga swine sa rehiyon 6 kag bastante ini para sa konsumo sang mga pumuluyo.

Facebook Comments

bomboradyo