ILOILO CITY- Hatagan sang prayoridad sang Iloilo City Government ang mga active vendors nga nagaokupa na nga daan sang mga kiosko kag mga pwesto sa mga merkado publiko sa syudad sa patigayunon nga relocation sa ila.

Ini sa tion nga umpisahan na ang rehabilitation sang Lapaz Public Market, Mandurriao Public Market kag Arevalo Public Market.

Sa interview sang Bombo Radyo kay Councilor Ely Estante, iya ginpahayag nga sa subong,wala pa sang nakasugtan kon ano naman ang plano sa mga tag-iya sang kiosko nga ginbayaan kag ginpaarkilahan ini sa iban.

Suno kay Estante, mangin sa mga transients vendors, ginaplano pa kon ano ang himuon sa ila.

Sa bahin sang Lapaz Public Market, inisyal nga napilian nga relocation site sa mga vendors amo ang dalan Rizal kag Railway sa diin may yara sang gym nga mahimo gamiton; sa Arevalo, posible nga relocation site ang playground sa plaza; sa bahin sang Mandurriao, padayon pa nga ginatumod ang mangin relocation site.

Gindugang pa ni Estante nga ginapasiguro man sang Local Economic and Enterprise Office nga wala sang vendors nga ma-displace.

Matandaan nga nagpatawag sang pagsinapol ang kumitiba sang konsehal upod sa mga stakeholders kag vendors associations sa Iloilo City agud ma-address ang ila mga concerns angot sa palaabuton nga rehabilitation nga ginalauman nga magasugod sa sulod sang duha ka bulan.

Suno pa kay Estante, katuyuan sang pagrehabilitate sang merkado amo nga maka-compete ini sa mga malls bangod sa merkado,may ayu na, may paaman pa.

Facebook Comments

bomboradyo