Gintay-og sang 7.1 magnitude nga linog ang Davao Occidental kagab-i.

Suno kay Philippine Institute of Volcanology and Seismology (Phivolcs) science research assistant Tom Simborio, “tectonic” ang origin sang linog nga may kadalumon nga 116-kilometers gikan sa duta.

Santu sa Phivolcs’ Earthquake Intensity Scale (PEIS), ang magnitude 7 tremor ang ginakonsidera na nga “destructive”.

Pahayag niya, mabaskog ang pag-uyog sang duta kag indi lang sa Davao Occidental nabatyagan ang linog kundi sa bug-os nga Mindanao.

Sa pihak sang kabaskugon sang temblor, nagpasalig ang Phivolcs kag Pacific Tsunami Warning Center nga wala sang tsunami nga magaluntad.

Ang mga residente sang General Santos City ang nakabatyag sang linog bilang Intensity 5 samtang Intensity 4 naman sa Davao City.

Dugang pa si Simborio, wala sang may ginalauman nga damage kun tubtob lang sa Intensity 5 ang linog apang lauman ang mga aftershocks.

Base naman kay Jose Abad Santos Mayor Jason John Joyce, wala sang pagkaguba sa iya nga lugar kasunod sang linog nga nabatyagan.

Wala man sang reported damage sa Davao City suno kay disaster management chief Alfredo Baloran apang nakaalerto ang mga otoridad kag rescue teams sa syudad para sa posible nga mga aftershocks.

Samtang kadungan sang paglinog, nagbuga man sang lava ang Mayon Volcano sa diin ini ang yara sa Alert Level 1 humalin sang Hulyo 17, 2020 kag naka-record sang 10 ka mga low-frequency volcanic earthquakes sang Enero 20, 2021.

Facebook Comments

bomboradyo