ILOILO CITY- May yara sa gihapon sang mga salawayon sa mga border control points sa Iloilo City sa tunga sang pagpaidalom sang syudad sa Modified Enhanced Community Quarantine Status.

Sa interview sang Bombo Radyo kay Police Lt Raffy Señeres, Deputy Chief of Police sang Zarraga Municipal Police Station nga nag-augment sa quarantine control point sa Mohon, Arevalo, iya ginpahayag nga may mga nagasulod sa syudad nga nagatingob- sakay sa mga pribado nga salakyan apang ang iban sa ila ang wala man sang importante nga katuyuan sa syudad.

Suno kay Señeres, may yara man sang mga nagasulod sa syudad nga may dala nga mga bata kag wala man sang valid nga rason kon ngaa nagapadulong sila sa Iloilo City.

Dugang pa niya, may yara man sang mga travellers nga may ginapresentar nga identification card apang wala sang dala nga travel ukon quarantine passes.

Suno kay Señeres, sa subong, istrikto sila sa gihapon sa pagcheck sa mga pasahero kag mga motorista nga nagasulod sa syudad.

Nagpangabay naman ini sa tanan ilabi na sa may mga dala nga bata nga ibilin na lang bangod pat-od nga pabalikon lamang sila kag maruya lang sa ila byahe.

Facebook Comments

bomboradyo