ILOILO CITY- Ginpirmahan na ni Iloilo Governor Arthur Defensor Jr. ang executive order nga naga-adopt sang (COVID-19) Vaccine Deployment and Immunization Plan 2021-2022 or COVAC PLAN 21-22 nga ginbase sa framework nga ginplastar sang Department of Health.

Sa interview sang Bombo Radyo kay Governor Defensor, iya ginpahayag nga sa nasambit nga plano, naplastar ang listahan sang eligible vaccine population nga hatagan sang prayoridad, pagtumod sa mga vaccine centers, cold chain storages nga gamiton, kag mangin ang mga personnel nga kinahahanglan sa COVAC PLAN.

Suno sa gobernador, may yara naman sang timeline sang mga aktibidad angot sa vaccination sa probinsya kag ini ang kompleto na.

Sa pagkamatuod suno sa iya, samtang gina-draft pa lang ang nasambit nga vaccination plan, nagahulag na ang iban nga components sini kaangay sang pagpirma sang provincial government sa tripartite agreement sa British pharmaceutical firm nga AstraZeneca kag sa gobyerno nasyonal.

Magluwas diri, nakahanas naman ang probinsya sang mga tawo nga may dako nga papel sa patigayunon nga vaccination sa mga pumuluyo sang probinsya.

Gintuad naman ni Defensor nga mahimo nga sa second quarter sang 2021 pa makaabot ang bakuna.

Matandaan nga nagtalana ang provincial government sang P95 million para sa pagbakal sang COVID-19 vaccines.

Facebook Comments

bomboradyo