ILOILO CITY – Naistorya na sang Molo Police Station ang duha sa tatlo ka persons of interest may kaangtanan sa pagluthang-patay kay Glen Peremne, ang pinuno sang Health and Sanitation Division sa Iloilo Fish Port Complex.

Ang tatlo ka persons of interest ang lunsay nagatrabaho man sa Iloilo Fish Port Complex.

Sa interview sang Bombo Radyo kay Police Major Marlyn Roquero, hepe sang Molo Police Station, iya ginpahayag nga ang duha ka persona nga gin-usisa sang mga pulis ang lunsay nagapamalibad sa kahilabtanan sa krimen.

Ginpahayag sang duha suno kay Roquero nga maayo man ang ila nga relasyon sa biktima samtang sila ang nagatrabaho sa fish port.

Ang isa pa ka person of interest ang wala pa naistorya sang pulis bangud nag-absent ini sa iya nga duty.

Sa subong, natipon na sang mga pulis ang mga footages sang closed circuit television (CCTV) nga halin sa fish port, Barangays Baluarte kag Boulevard sa Molo, kag padulong sa Barangay San Juan sa Molo kun sa diin ginpatay si Peremne sang Abril 23. Ini nga footages ang ipasa sa IT department agud ma-enhance pa kag makilala ang salakyan nga ginsakyan sang mga suspek.

Nahibaluan nga una na nga ginpahayag sang Molo Police Station nga ginasundan ang anggulo nga work-related ang rason sang insidente bangud ginapahayag istrikto sa trabaho si Peremne kag nakasugid ang asawa sini nga may nakabais siya sa fish port bangud sa iya pagpatuman sang mga pagsulundan.

PHOTO: CMO

Sa subong, may marching order na si Mayor Jerry TreƱas nga solbaron ang kaso sa pagpatay kay Peremne nga utod ni Bureau of Jail Management and Penology (BJMP) Region 6 spokesperson kag Assistant Regional Director for Administration Jail Sr. Supt. Gilbert Peremne.

Sa interview sang Bombo Radyo kay Iloilo City Police Office (ICPO) Director Pol. Col. Uldarico Garbanzos, iya ginpahayag nga ginmanduan na ang Molo Police Station nga magtipon sang mga ebidensya agud nga mapasakaan sang kaso ang nagpatay sa biktima. #

Facebook Comments

bomboradyo