Gilayon nga ginadapatan sang nagakaigo nga pagbulong ang duha ka lalaki nga pilason matapos na-aksidente ang ginamaneho nga motorsiklo sa isa ka ginakay-o nga manhole sa Barangay Banuyao, La Paz, Iloilo City.

Ang duha ka driver amo si John Ken Jaruda kag certain Paul, lunsay ligal ang edad kag residente sang La Paz, Iloilo City.

Sa interview sang Bombo Radyo kay Milo Magcanam sang Advent Rescue Motorized Group, Incorporated, iya ginpahayag nga halin sa Barangay Balabago, Jaro, Iloilo City ang duha kag posible nga nagkarera pa ang mga ini antes nakabulasot sa ginakay-o nga manhole.

Nag-angkon naman ang duha ka lalaki sang mga pilas sa nanuhay-tuhay nga bahin sang lawas.

‘WALA SANG EARLY WARNING DEVICE’

-- Web Ads --

Wala sang railings ukon early warning device sa ginakay-o nga manhole sa Barangay Banuyao, La Paz, Iloilo City kun sa diin nakabulasot kag na-aksidente ang duha ka mga lalaki nga nagamaneho sang motorsiklo.

Sa interview sang Bombo Radyo kay Police Master Sergeant Dennis Yee, imbestigador sang La Paz Police Station, iya ginpahayag nga madasig ang pagpadalagan sang duha ka driver nga nagasundanay kag sang nakabulasot sa manhole, nadagdag gid diri ang driver nga si certain Paul.

Maswerte lang suno sa pulis nga wala ang mga ini natuslok sang mga nagalabaw nga kabilya.

Ginapahayag nga naka-inom sang makahulubog nga ilimnon ang duha ka lalaki antes na-aksidente.

Ginpasalig naman sang pulis nga pakig-angutan nila ang contractor sang ginakay-o nga manhole agud ma-usisa kun ngaa straw rope lang ang ginpalibot sa lugar kag wala sang early warning device.

Facebook Comments

bomboradyo