Nag-abot na sa Tokyo 2020 Paralympic Village ang duha ka Afghan athletes kasunod sang ila safe evacuation sa Afghanistan.

Ini ang ginkumpirma sang International Paralympic Committee (IPC) kahapon, Agusto 28.

Ang duha ka para-athlete amo sanday Zakia Khudadadi kag Hossain Rasouli.

Suno kay Bombo International Correspondent Josel Palma, direkta sa Japan, una na nag-apelar si Khudadadi pinaagi sa video message nga buligan sila nga makahalin sa Kabul para malab-ot man ang ila handom nga ma-tiglawas ang ila pungsod sa Paralympics.

Gilayon naman nga nagbuligay ang paralympic groups agud ma-evacuate ang duha ka atleta sa Kabul, Afghanistan — nga subong ginasakop na sang Taliban militants sa diin may natabo pa nga duha ka bombing attacks sang damlag lang sa gwa sang Hamid Karzai International Airport kag sa gwa sang isa ka hotel.

-- Web Ads --

Nahibaluan nga wala man naka-attend sanday Khudadadi kag Rasouli sa Tokyo Paralympics Opening Ceremony.

Si Khudadadi ang first female athlete sang Afghanistan nga maga-compete sa Paralympics humalin sang 2004.

Magahampang siya sa women’s K44 -49kg weight category sa taekwondo sa Huwebes, Septyembre 2.

Samtang si Rasouli naman ang magahampang sa men’s 400m T47 athletics event sa Byernes, Septyembre 3.

Facebook Comments

bomboradyo