Patay ang apat ka estudyante kag pilason ang kapin 10 ka indibidwal matapos nagpangluthang ang isa ka 15-anyos nga high school sophomore sa sulod sang eskwelahan sa Michigan sa Estados Unidos.

Sandig sa nakit-an sa security cameras, naghalin sa bathroom ang suspek antes ini nagpaarak sang luthang sa hallway sang Oxford High School.

Nakapalupok ang suspek sang 15 tubtub 20 ka beses gamit ang semiautomatic handgun antes ini nadakpan sang otoridad sa eskwelahan.

Nadiskubrehan sang ulihi nga apat ka adlaw pa lang ang nagligad halin sang ginbakal sang amay sang suspek ang 9-millimeter Sig Sauer handgun nga gingamit sang bata sa krimen.

Indi pa ma-establisar sang mga pulis kun ano ang motibo sa pagpang-atake kag kun planado ang krimen. Wala man sang ginahambal ang suspek, kag wala man sang statement halin sa iya ginikanan.

-- Web Ads --

Nagapabilin sa kustodiya sang pulis ang suspek, kag nagahulat nga pasakaan sang kaso sa pagpatay sa apat ka kaangay niya nga estudyante.

Sa mga pilason, tatlo ang yara sa kritikal nga kondisyon, lakip na ang isa ka 14 anyos nga bata nga ginapahayag ‘extremely critical’ ang kondisyon. ##

Facebook Comments

bomboradyo